MOJ’N

Beste ni’jkommers of import oet de stad;

Wi’j als platteland bewonners vind ’t good

da’j hier bi’j uns in Wenterswiek zelf

of de de naoberschap komt wonnen

Jullie bunt van harte welkom!

De meest vaste leu wont hier al jaoren en

generaties lange. Unze veurolders en wi’j

hebt ‘t land en de bossen emaakt  tot ‘t

landschap wat’t  no is. Hol’t alsteblif zo!

Ok met völle plezeer en aandacht veur’t

boeten laeven en’t de hoo of de boo hier.

Baeken deur’t boetengebied,holtwallen.

Scholteboeren en gewone boerderi-jen

Alles kump tot stand deur’t ónderholt

van de boeren en boetenleu,en anderen

De natuur mot zelf ‘t ovverige doon.

Dat kan allene a’j respect hebt veur

de natuur en de leu dee zorgt dat’t

zo blif zoals’t no is.’T Stunk hier

in de buurte wal ens naor ale.

De beeste loopt in de weide en de hoonder

loopt wal ens in’t kroelzand.’T stuf

wal ens enorm a’j plankgas deur de zand-

waege joekelt. De wasse zit dan vol zand

en de vensters ok. Met slecht waer völle drek.

 En a’j met de daleträder komt mo’j wal

ens oetkieken,soms kump d’r  maorzo

 vootvolk an met opschöttelingen,

of ne tractor of ne olderwetse  paerd en wagen an.

Maor’t belangriekste is da’j de bewonners

gewoon greut en vrendelijk goeiendag wenst.

Een glimlach dut al völle wonderen.

Een klein kniksken,en’t respect is d’r.

Greuts waen lik zo eigenwies.

Dat geld veur iderene en ovveral ovverigens.

Oh jao,de meeste leu praot hier ok plat,

Daor mugge wi’j ok trots op waen,

“T heurt bi’j de streek!Probeert maor ens.

Dan ku’j zeggen:”ik heur d’r bi’j”

Ik zol zeggen geneet van ow bestaon

Op’t platteland !

Jan van der Lende,gewone burger ,alhier